На фінішнай прамой прафсаюзнага спаборніцтва ў тройку першых камбайнераў-тысячнікаў Астравеччыны ўварваўся тандэм у складзе Уладзіміра Шаблавінскага і Ігара Бараноўскага з КСУП “Гудагай”.
Нагадаю, што амаль увесь жніўны п’едэстал занялі хлебаробы гэтай гаспадаркі.
– Адметна, што два гады назад менавіта ў гэты дзень, 4 жніўня, мы віншавалі камбайнерскі экіпаж на чале з Уладзімірам Шаблавінскім з 3-м месцам на ўборцы, – віншуючы тысячнікаў, нагадаў старшыня райкама прафсаюза работнікаў аграпрамысловага комплексу Юрый Адула. – З перамогай вас!
Да віншаванняў з грашовай прэміяй далучылася і старшыня прафсаюзнай пярвічнай арганізацыі КСУП “Гудагай” Ганна Налівайка.
– У пары з Ігарам некалькі сезонаў. Ён працуе ў аўтапарку №4, а летам бярэ адпачынак, – расказаў Уладзімір Шаблавінскі. – Прыемна, што наш плён акупіўся і мы сталі аднымі з першых тысячнікаў Астравеччыны.
Падтрымаць сваіх мужчын у такі важны момант і раздзяліць з імі радасць перамогі на поле прыехалі Кацярына – жонка Уладзіміра – і Эмілія – дачка Ігара.
