На мінулым тыдні карэспандэнт АП даведалася, як спраўляюцца з палявымі работамі «варнянцы», хто ім дапамагае і з якім настроем працуюць на сяўбе механізатары.
Рэпартаж з вясенне-палявых работ у КСУП “Варняны”
На мінулым тыдні карэспандэнт АП даведалася, як спраўляюцца з палявымі работамі «варнянцы», хто ім дапамагае і з якім настроем працуюць на сяўбе механізатары.
У гэтым КСУПе, як і ў астатніх гаспадарках, размеркаванне пасяўных плошчаў залежыць ад дзяржзаказу і патрэб жывёлагадоўлі. Пасля перадачы ў арэнду КСУП «Гудагай» і «Гервяты» двух малочна-таварных комплексаў нагрузка на тэхніку зменшылася, што дазволіла «варнянцам» пад патрэбу нарыхтоўваць травяністыя кармы і фураж.
У параўнанні з мінулым годам у структуры пасяўных плошчаў КСУП «Варняны» змяненні ёсць. Пад рапс тут адвялі крыху менш, чым у мінулым годзе, – 350 гектараў. Збожжавыя занялі 1 168 га: паменшалі плошчы пад пшаніцай і жытам, затое ўпершыню за некалькі апошніх гадоў на восень пасеялі ячмень. Гэтая культура найхутчэй даспявае, што дазваляе хлебаробам не спяшаючыся яе абмалаціць, а заадно і праверыць хлебаўборачную тэхніку перад масавым жнівом. Ёсць карэктывы і ў яравым кліне: на «варнянскіх» землях сёлета пабольшае пшаніцы і ячменю, у тым ліку піваваранага, затое паменшае аўсу, грачыхі. На ўзроўні мінулага года засталіся плошчы пад гарохам і цукровымі буракамі. Кукурузу на зерне ў «Варнянах» прыкрыюць ажно на 150 гектарах (у 2022-ім – на 22 га).
У дзень прыезду карэспандэнта работы ў гаспадарцы вяліся па некалькіх франтах. У Валэйкунах сеялі ячмень, у Грышкойцях – авёс, у Карвэлях – пшаніцу. Глебу аралі ў Стаўбурах, а культывавалі ў Беразоўцы, Грышкойцях, Дубніках. Непадалёк апошняга населенага пункта апрацоўвалі азімы рапс.
На энерганасычаным трактары «Беларус» у счэпцы з пасяўным агрэгатам АПП-6 не першы сезон прыкрывае насенне Валерый Дзенюш. Да слова, мужчына з гэтым добра спраўляецца. Некалькі гадоў назад райкам прафсаюза работнікаў аграпрамысловага комплексу прызнаў механізатара лепшым сейбітам на вясенне-палявых работах.
У бункер сеялкі змяшчаецца каля 1,5 тоны насення, але яго вага можа вар’іравацца ў залежнасці ад культуры: пшаніца, напрыклад, крыху цяжэйшая за авёс.
– Гэтага аб’ёму хапае на 6 гектараў, потым насенне механізавана дасыпаем, – працягвае Валерый Станіслававіч. – Сяўба сёлета няпростая – гэта пацвердзяць многія механізатары. Але справіліся.
Варта адзначыць, што ў КСУП «Варняны» працуюць і родныя браты Валерыя: Іван – галоўным аграномам, Эдуард – вадзіцелем.
Дзенюшы родам з Быстрыцы. Да вясковай працы звыклыя з маленства. Іх бацька быў трактарыстам у тамтэйшым калгасе, таму і хлопцы, што называецца, пры тэхніцы з дзяцінства.
– Эдзік дык і выгадаваўся ў кабіне бацькавага трактара. Памятаю, бульбакапанне. А куды малога дзець? Да таты! – расказвае Валерый.
У тэму: летась Эдуарда Дзенюша райкама прафсаюза работнікаў АПК прызнаў лепшым вадзіцелем на корманарыхтоўцы.
Хоць тэхніка ў гаспадарцы, у адрозненне ад тых жа «Гервят» ці саўгаса «Падольскі», даўно не абнаўлялася, механізатары і вадзіцелі КСУП «Варняны» не трацяць аптымізму і працуюць не менш старанна і плённа за калег з іншых сельгаспрадпрыемстваў.
З-за вялікіх аб’ёмаў веснавых работ «варнянцам» не хапала сваіх тэхнічных магчымасцей, таму на фінішнай прамой раённай сяўбы збожжавых падрыхтаваць глебу і прыкрыць у яе насенне ім дапамаглі КСУП «Гудагай», «Гервяты» і РУП «Астравецкі саўгас «Падольскі».
На некалькіх участках паміж Беразоўкай і Больнікамі кіпела работа. На энерганасычаным трактары «Беларус» Генрых Млынскі з КСУП «Гудагай» культываваў глебу.
– У «Варнянах» з 14 красавіка. Дапамагчы суседзям мы заўсёды рады, – адзначыў механізатар.
Услед за «Беларусам» ішоў невялікі трактар, у прычэп якога паляводы кідалі камяні.
Літаральна праз дарогу два апрысквальнікі апрацоўвалі рапс. Адным кіраваў малады, але вопытны Андрэй Бразевіч, чый партрэт летась быў занесены на раённую Дошку гонару, другім – механізатар з амаль 40-гадовым стажам Іван Яновіч.
Текст: Алёна Ганулич
