Міжнародны фестываль мастацтваў «Славянскі базар у Віцебску» – адзін з самых любімых і чакаемых музычных форумаў года. Упершыню прафсаюзны камітэт КСУП «Гудагай» зладзіў для сваіх работнікаў паездку на начны канцэрт «Залаты хіт». 

– Штогод стараемся кудысьці з’ездзіць. Пабывалі ў многіх знакавых мясцінах Беларусі, але на «Славянскі базар» трапілі ўпершыню. Уражанняў шмат – і не толькі ў мяне, – расказвае прафсаюзны лідар гаспадаркі Ганна Налівайка. – Праграма гэтага мерапрыемства насычаная.  
На сцэне летняга амфітэатра «Залаты хіт» сабраў лепшых зорак эстрады 90-х гадоў з розных краін свету. Праграму па-майстэрску вяла Ілона Бранявіцкая. На сцэну выходзілі расійскія гурты «На-На», «Дыскамафія», «Міраж» і іншыя. Найбольш спадабалася выступленне спецыяльнага госця з Італіі Pupo – вельмі харызматычны артыст. Тры гадзіны праляцелі незаўважна. 
Да канцэрта ў нас быў час пагуляць па Віцебску, паглядзець тэматычныя пляцоўкі і падзівіцца на вырабы ў горадзе майстроў. Каб адчуць атмасферу і энергетыку фесты­вальнай сталіцы, трэба абавязкова пабы­ваць на «Славянскім базары».