Вадзім Вянгроўскі размяркоўвае фронт работ
Нягледзячы на дождж і спёку гэтыя людзі працуюць літаральна круглы год на ўлонні прыроды. Іх называюць рэаніматарамі зямлі і галоўнымі памочнікамі аграрыяў. Дзякуючы ім сельгасугоддзі Астравеччыны штогод прырастаюць сенажацямі і пашай, адпаведна павялічваюцца і малочныя рэкі…
Пра клопаты раённых меліяратараў расказаў Вадзім Вянгроўскі:
– У правядзенні меліярацыйных работ у першую чаргу павінен быць гаспадарчы падыход. На землях, якія былі пакрыты хмызняком і кустоўем, буяе сакавітая трава. Значная частка вернутых у сельгасзварот плошчаў адведзена пад пашу ці сенакос.
У гэтым годзе мы займаліся тэхнічным абслугоўваннем і рамонтам збудаванняў на меліярацыйнай сетцы, ачышчалі каналы ад драўнінна-хмызняковай расліннасці і заглейвання.
Цяпер праводзім рэканструкцыю аб’ектаў у КСУП “Міхалішкі” і РУП “Астравецкі саўгас “Падольскі”. Калі здадзім аб’екты, гэтыя ўчасткі будуць добрым падспор’ем для корманарыхтоўшчыкаў.
З сярэдзіны мая пачалі абкошваць меліярацыйныя сеткі – гэта парадка 900 кіламетраў. На тэхнічным абслугоўванні каналаў задзейнічана два звяны – сем касілак і тры-чатыры мотакасы.
З ліпеня будзем працаваць і на Ашмяншчыне: праводзіць культуртэхнічную меліярацыю на аб’екце эксперыментальнай базы “Баруны”. Летась увялі ў эксплуатацыю 200 гектараў зямель.
Самае важнае ў любой галіне – кадравае пытанне. Сёння можна купіць любую тэхніку, галоўнае, каб было каго за яе пасадзіць. Удзячны працаўнікам, адміністрацыйна-кіраўніцкаму персаналу за вернасць абранай прафесіі, а ветэранам нашай галіны – за прыклад самаадданасці і працавітасці.
