Дзмітрый Пагада, інжынер-механік КСУП «Варняны» (стаж 2 гады):
– Трэці год працую ў гаспадарцы. Спачатку атрымаў сярэдне-спецыяльную адукацыю ў Вілейскім прафесійна-тэхнічным каледжы. Пазней адвучыўся ў Беларускім дзяржаўным аграрна-тэхнічным універсітэце. Маю вадзіцельскія катэгорыі на легкавы аўтамабіль, грузавы катэгорыі С, калёсныя трактары А, В і камбайн. Хоць на апошнім не працаваў, але хацелася б. Ніхто не адпусціць: на жніве ў мяне, як у механіка, клопатаў хапае: нарад, дакументацыя, пошук патрэбных запчастак, рамонт – фронт вялікі.
Спярша загадваў механічнымі майстэрнямі. Адказваў за парадак на тэрыторыі, выпуск тэхнікі, яе пастаноўку на захоўванне, рамонт і многае іншае. Потым прызначылі інжынерам-механікам. Спецыфіка работы значна не змянілася. На балансе КСУП «Варняны» 42 трактары, з якіх 7 энерганасычаныя, 8 камбайнаў. Сёлета атрымалі новы айчынны зернеўборачны агрэгат GS12A1. Парк сельгастэхнікі папоўнілі ў гэтым годзе і два «Беларусы-1521».
(Пацікавілася ў маладога спецыяліста, што ён змяніў бы ў рабоце, каб дазваляла фінансавае становішча гаспадаркі. – Заўв. аўт.)
– Абнавіў бы тэхніку, у тым ліку прычапныя агрэгаты. Бо наша моцна састарэла, а да замежнай знайсці і набыць патрэбныя запчасткі задача, лічы, невырашальная. Так што лепш набываць айчыннае: плугі, культыватары, камбайны…
Хацелася б, каб «Варняны» былі такімі ж паспяховымі і багатымі, як паўтара дзесяцігоддзя назад.
