Нацкія дзеруны, капыткі, вядзер, цапяліны, бабка… Смачнае свята гудзе ў Воранаве
Знатныя стравы на фэст прыгатавалі гаспадыні ўсіх сельгаспрадпрыемстваў Воранаўшчыны і нават байкеры. Канешне ж, пачэснае месца заняў падворак з “нацкім дзеруном”, які праславіў нашу Воранаўшчыну далёка за межамі рэгіёна. З асалодай духмянымі, з пылу з жару дзерунамі частаваліся госці свята і бралі майстар-клас па іх прыгатаванні ў захавальніц рэцэпту гэтай даўняй стравы. Што тут скажаш: бульбу спрытна таркавалі і ліха выпякалі.
Здавалася, з таркаванай бульбы знаем нямала страў. Ды на свяце адкрылі для сябе новыя, якімі колісь сілкаваліся яшчэ нашы дзядулі і прадзядулі. Беларускім ударам па голаду жартоўна гіркаўскія гаспадыні назвалі капыткі. Рэцэпт хоць немудрагелісты, але страва — пальчыкі абліжаш. А як гавалі вядзер прадстаўнікі эксперыментальнай базы “Кастрычнік”, дзіву даваліся нават сталыя людзі! На вогненным пні ён няспешна “падрумяньваў” свае бакі. Адбою не было ад жадаючых паспрабаваць больцішскія каралеўскія цапяліны, “элітныя” клёцкі, пагародзенскія дранікі, доцішскія картаплянікі — тыя ж дранікі, толькі з мясам. Бульбяныя бліны па-пераганцаўску пяклі ў партызанскай зямлянцы, а місявіцкая бабка пераносіла гасцей у часы Савецкага Саюза…
Што тут казаць, калі бульба на стале, то і песня ў галаве. А на падворках яе было ўдосталь. Госці і душой адпачывалі, і самае гасціннае сельскагаспадарчае падвор’е, смакуючы нацыянальныя стравы, выбіралі. Бясспрэчным пераможцай прызнаны КСУП “Эліт-Агра Больцінікі”, яны ж і атрымалі прыз сімпатыі гледачоў, на другім месцы — КСУП “Гіркі”, замкнула тройку лідараў КСУП “Больцішкі”.
У конкурсе на самае хуткае паяданне дранікаў перамогу святкаваў Алег Бялоў.
