«Каралева палёў» – адна з самых важных культур, якая займае значнае месца ў рацыёне буйной рагатай жывёлы. Кукурузу на сілас убіраюць усе гаспадаркі раёна. Першымі кормаўборачныя камбайны ў поле вывелі аграрыі КСУП «Гервяты». Такі хуткі старт цалкам апраўданы: незалежна ад фазы развіцця расліны, уборка павінна быць скончана да канца кастрычніка, калі ўжо няма эфектыўных тэмператур і расліны не накопліваюць энергію.
У агратэхнічным сэнсе сёлетні год выдаўся спрыяльным для раённага раслінаводства. У першую палавіну вегетацыі кукурузы было цёпла і суха, а ў другую – вільготна і з патрэбнымі плюсавымі тэмпературамі. Лічы, ідэальныя ўмовы для «каралевы палёў», таму і вымахала яна на палях раёна рослай і налітай.
Карэспандэнт «раёнкі» паназіраў за працэсам скошвання кукурузы непадалёк ад малочна-таварнага комплексу «Дайлідкі».
Дарэчы, у КСУП «Гервяты» адвялі самыя вялікія ў раёне плошчы пад цеплалюбівіцу – 1 700 гектараў, з якіх у дзень майго візіту 10% былі зжаты і закладзены ў тэхналагічныя ёмістасці для захоўвання травяністых кармоў. Да слова, кукурузныя палі ў гэтай гаспадарцы сканцэнтраваны ля малочна-таварных комплексаў і ферм, дзе адбываецца закладка сіласных траншэй, што значна эканоміць і час, і паліва.
У Дайлідках непадалёк ад комплекса звяно кормаўборачнай тэхнікі ў складзе двух камбайнаў і некалькіх адзінак тэхнікі на адвозе (налічыла 8 машын!) заканчвалі абмалот кукурузнага поля. Толькі па тым, як хутка яны змянялі адна адну, можна было меркаваць, што ўраджайная сёлета вырасла «каралева». Зыходзячы з афіцыйнай зводкі, на круг аграрыі пакуль бяруць звыш 410 цэнтнераў – гэта з ўлікам таго, што звычайна ўборка пачынаецца са слабейшых участкаў.
Ветэрынарна-заатэхнічная служба МТК «Дайлідкі». Злева направа: Андрэй Следзевіч, Андрэй Іржыгітаў, Гражына Саўко і Аляксандр Чайкін
– Жаць кукурузу пачалі 19 жніўня. Пакуль гэтым займаемся я і Ігар Гудзінскі, але, магчыма, тэмпы і аб’ёмы будуць нарошчваць, і кампанію нам складзе яшчэ адзін кормаўборачны камбайн, – расказаў Вячаслаў Бабарыка, якога некалькі гадоў назад пераманілі ў КСУП «Гервяты» з «Варнян». – На гэтым кормаўборачным камбайне Krone BiG X 680 працую другі сезон. Звер, а не машына! Наколькі ведаю, яе прадукцыйнасць дасягае 1,5 тысячы тон. Здрабненне, плюшчэнне – усё аўтаматызавана.
Вячаслаў Бабарыка на ўборцы кукурузы
На камбайне «Ягуар» працуе Ігар Гудзінскі
Увесь сілас тут нарыхтоўваюць з дапамогай спецыяльных кансервантаў, якія аўтаматызавана ўносяцца падчас уборкі. Добра вядома, што ніякія рэчывы не палепшаць якасць будучага корму, калі не выкананы элементарныя правілы сіласавання. Таму зазірнула і на комплекс, каб паглядзець за працэсам закладкі траншэі. Для сябе адзначыла, што ёмістасць цалкам падрыхтавана: укрыта замацаванай плёнкай цёмнага колеру, перад уездам высцелена саламяная падушка.
Адзін з самых вопытных трамбоўшчыкаў гаспадаркі Віктар Гродзь не першы сезон займаецца гэтым на «Амкадоры», які абсталяваны спецыяльнымі сіласнымі віламі. Такое сельскагаспадарчае ноу-хау ў счэпцы з машынай цяжкога класу ідэальна падыходзіць для падсоўвання і трамбоўкі масы. Запытала ў механізатара, як працуецца ў гэтым сезоне.
Трамбоўшчык Віктар Гродзь
– Выдатна! Так бы кожны год. Уявіце, цэлую траншэю заклалі літаральна за паўдня. Будзем пераязджаць у Рымдзюны і там брацца за работу! – з умешкай адказаў мужчына.
СЛОВА СПЕЦЫЯЛІСТУГражына Саўко, галоўны ветэрынарны ўрач КСУП «Гервяты»:
– Сілас – адна з самых галоўных крыніц крухмалу, а значыць – і энергіі. Напрыклад, пры захворваннях абмену рэчываў у жывёлы за кошт гэтага атрымліваецца больш збалансаваны рацыён і каровы менш хварэюць. Даследванні паказалі, што цяпер здробненая сіласная маса ўтрымлівае 22% крухмалу. Самае галоўнае – убраць кукурузу своечасова. Спадзяёмся, што гэта зімоўка пройдзе паспяхова.
