Чым займаюцца ў полі механізатары КСУП “Варняны”

Яшчэ некалькі гадоў назад ворыўныя землі ў КСУП «Варняны» былі самымі вялікімі ў раёне, але па аб’ектыўных прычынах пло­шчы зменшыліся – гэта дазволіла гаспадарцы своечасова і ў поўных аб’ёмах праводзіць большасць агратэхнічных мерапрыемстваў. Мяркуючы па раённай зводцы, «варнянскія» механізатары дэманструюць добры тэмп на сяўбе яравых – наперад яны прапусцілі толькі штогадовых лідараў з КСУП «Гудагай» і «Гервяты». 
На якіх вясенне-палявых работах занятыя аграрыі КСУП «Варняны», даведаўся карэспандэнт «раёнкі». 

Галоўны аграном КСУП «Варняны» Рыгор Яромін лічыць: лепш менш пасеяць і больш дбайна даглядзець, каб атрымаць ураджай. 
Яравы клін складае 2 711 гектараў. Да слова, хлебаробы гэтай гаспадаркі пасеялі звыш 1 200 ранніх збожжавых культур: 250 гектараў аўса, амаль 700 – ячменю, 200 – пшаніцы і 70 – зернебабовых. Акрамя гэтага, адвядуць 200 гектараў пад цукровыя буракі, 1 000 – пад кукурузу, 186 – пад аднагадовыя травы, 90 – пад грэчку.  
– Размеркаванне структуры пасяўных плошчаў залежы­ць ад некалькіх фактараў: дзярж­­­заказу на збожжа, патрэб жы­вёла­гадоўлі, – па дарозе на поле расказаў галоўны аграном. – У параў­нанні з мінулым годам змя­ненні ёсць: на 80 гекта­раў памен­шалі плошчы пад цукро­вымі буракамі, кукуруза застала­ся на ўзроўні, пасеялі менш ячменю і больш аўса. 

Некалькі гадоў назад частка варнянскіх зямель была перададзена ў арэнду КСУП «Гудагай» і «Гервяты», яшчэ некалькі дзясяткаў гектараў у карыстанне ўзяло прыватнае прадпрыемства «Белагразобр».
– Сёлета землі арандаваў Слуц­кі цукрова­рафі­надны завод. Усе агратэх­нічныя аперацыі, пачынаючы ад заворвання глебы і заканчваючы ўборкай цукровых буракоў, яны робяць самі і на сваёй тэхніцы, – патлумачыў галоўны тэхнолаг варнянскіх палёў.

«Варнянцы» таксама прыгорт­ваюць у глебу насенне цук­ровікаў: на канец мінулага тыдня было пасеяна каля 150 гектараў. 
Калі збожжа можна сеяць і камбінаванымі пасяўнымі агрэ­гатамі, і невялікі СПУшкамі, то для сяўбы буракоў і кукурузы лепш выкарыстоўваць спецыяльную тэхніку – сеялкі дакладнага высеву. Гэта і эканоміць насенны матэрыял, і забяспечвае амаль што ідэальную раскладку «бубак». Для гэтых мэт «варнянцы» ўзялі ў арэнду падобную сеялку ў суседзяў – КСУП «Кракоўка» Ашмянскага раёна. 
– Сёлета ўпершыню набылі спецыяльнае насенне цукровых буракоў, якія вырошчваюцца па тэхналогіі «канвіза». Па рэгламеце пасевы цукровікаў варта апрацоўваць тры разы, а па гэтым метадзе – хапае двух, што эканоміць сродкі, час, паліва, – патлумачыў Рыгор Яромін. 
Непадалёк ад вёскі Нідзяны насенне буракоў у глебу пры­горт­ваў Станіслаў Янкун. Паці­ка­вілася ў механізатара, як сябе зарэкамендавала ў рабоце сеялка.  

– Нармальна, буракі выся­ваюц­ца, як таго і патрабуе тэхналогія, у 11 радкоў. Праўда, пад узлескам не ўлезці – мокрая глеба. Варта яшчэ раз пусціць культыватар, – звяртаючыся да агранома, параіў сейбіт. 
Дарэчы сказаць, на другім канцы гэтага поля, якое раскінулася на 70-ці гектарах, вільгаць у глебе закрываў Казі­мір Масой­ць. Справу гэтую мужчына ведае як свае пяць пальцаў. Пацвяр­джэнне гэтаму – пазалеташняя перамога механізатара ў на­мі­нацыі «Культывацыя» ў раённым спабор­ніцт­ве, якое штогод ладзіць на вясенне-палявых работах райкам прафсаюза работ­нікаў аграпрамысловага комплексу. 
Паралельна з сяўбой буракоў у гаспадарцы працягваюць рыхтаваць глебу. Непадалёк ад атамнай электрастанцыі з плугамі па полі «хадзіў» Уладзімір Мят­леў­скі. Па прызнанні мужчыны, спра­баваў ён сябе ў якасці дальнабойшчыка – але не зраслося: сельскагаспадарчая тэхніка  больш па душы за вяліка­груз.
– Я варнянскі. У  вёсцы вырас і найлепш тут пачуваюся, звыклы да працы, – сказаў араты. – Дзень на дзень не даводзіцца, завор­ваю пад 25 гектараў глебы. 
На дзіва, механізатар нават згадзіўся сфатаграфавацца – да гэтага ніколі не згаджаўся, маўляў, навошта марнаваць час, калі работа стаіць. Што Ула­дзі­мір Мятлеўскі з кагорты пра­цавітых і, я б сказала, заядлых механізатараў, сведчыць той факт, што падчас раённага конкурсу прафесійнага майстэрства аратых свайго жалезнага каня мужчына не спыняў да самай раніцы наступнага дня. Аратага тады адзначылі ў намінацыі «За волю да перамогі». 
Зусім у іншым канцы гаспа­даркі, за вёскай Мацкелы, Валерый Дзенюш сеяў сумесь траў на энерганасычаным трактары «Беларус» у счэпцы з пасяўным агрэгатам АПП-6. Пацікавілася ў механізатара, насенне якой культуры найлягчэй прыгортваць у глебу. 
– Авёс лягчэйшы. Найцяжэй сеяць гарох, – патлумачыў хлеба­роб, пакуль у сеялку аўтама­тыза­вана засыпалася насенне. – На сяўбе не першы год, сама больш за змену засяваў 44 гектары. 
…Работы ў КСУП «Варняны» ў меру магчымасцей вядуцца па ўсіх франтах. З палівам, па словах механізатараў, праблем няма, а вось тэхніка час ад часу падводзіць…

Свае камэнтары дала нам старшыня прафсаюзу Лісоўская Тацяна:

- Праца ў полі гэта сапраўды вельмі цяжкая праца. Мы шануем нашы "палявыя" кадры. 
Многія з іх працуюць ужо больш за 30 гадоў. Па магчымасці прадпрыемства абнаўляе 
тэхніку. Сумесна з наймальнікам сочым за аховай працы. На пасяўной кампаніі людзі 
знаходзяцца часта круглы дзень. І самае галоўнае гэта забяспечыць камфортныя ўмовы 
для працы: гарачае харчаванне, месцы адпачынку, зручнае спецадзенне.

 Па матэрыялах "Астравецкая праўда"