У канцы мінулага тыдня старшыня райкама прафсаюза работнікаў АПК Ірына Пянькоўская і старшыня раённага аб’яднання прафсаюзаў Лідзія Шэўка ўзнагародзілі чарговых герояў жніва, якімі сталі лепшыя вадзіцелі на адвозцы і працаўнікі зернесушыльных комплексаў. Так, вадзіцель КСУП “Лукі-Агра” Вячаслаў Богуш першым у раёне на аўтамабілі “ГАЗ-3571” перавёз 1000 тон зерня. Яшчэ адным пераможцам раённага спаборніцтва на жніве-2019 стаў іншы вадзіцель гэта ж сельгаспрадпрыемства.Ігар Шыран на “МАЗе-555026” першым на Карэліччыне перавёз 2000 тон збожжа.
Сярод звенняў на дапрацоўцы зерня таксама ёсць свае героі. Аляксандр Жук і Арцём Чужаўка з СВК “Маяк-Заполле” на зернесушыльным комплексе “СЗК-10” дапрацавалі 1000 тон зерня. А звяно КСУП “Лукі-Агра” ў складзе Юрыя Трыбуця, Аляксандра Сянюты, Ігара Ракача і Васілія Гоцкі на КЗСВ-30 першымі ў раёне пераадолелі мяжу ў 5000 тон збожжа.
Атрымаўшы ўзнагароды, грашовыя прэміі і цёплыя словы падзякі ад лідараў прафсаюзнага руху Карэліччыны, удзельнікі ўборачнай кампаніі вярнуліся на свае працоўныя месцы.
